પારડી શહેર ભાજપમાંથી આજરોજ નગર પાલિકાના વર્તમાન વીજળી સમિતિના ચેરમેન અને પારડી શહેર ભાજપ સંગઠન મંત્રી કિરણ મોદી અને બાલાખાડીના ભાજપના બીજલ ઉર્ફે મુન્નો દેસાઈએ પારડી શહેર ભાજપ સંગઠનમાંથી પ્રાથમિક સભ્યપદેથી રાજીનામુ આપી દેતાં પારડીમાં ભાજપનો ડખો સપાટી પર આવી ગયો હતો. આ બંનેએ વારંવાર ઉપેક્ષા થતી હોવાનું કારણ દર્શાવી રાજીનામુ ધરી દેતા પારડીમાં ફરી એક ભૂકંપ સર્જાયો છે. થોડા દિવસ અગાઉ પારડી શહેર ભાજપ પૂર્વ મહામંત્રી અને નોટરી એડવોકેટ વિજય શાહે પણ રાજીનામુ આપ્યું હતું. જેમાં તેઓએ પોતાની નારાજગી સાથે અનેક આક્ષેપો પણ કર્યા હતા. આગામી 13 સપ્ટેમ્બરના રોજ તેઓ ‘આપ’ પાર્ટી માં જોડાઈ રહ્યા છે. જેને પગલે પારડી શહેર ભાજપમાં ભૂકંપ જેવી પરિસ્થિતિ સર્જાઈ છે. આજરોજ કિરણ શશીકાંત મોદી અને બીજલ ઉર્ફે મુન્નો કિશોરચંદ્ર દેસાઈએ વલસાડ જિલ્લા ભાજપ પ્રમુખ હેમંત કંસારાને રાજીનામુ આપી દીધું હતું. જેની કોપી સોશ્યલ મીડિયામાં વાયરલ થઇ હતી. પારડી શહેરમાં આપ પાર્ટી ભાજપના નારાજ કાર્યકર્તાઓને આપ પાર્ટીમાં જોડાવવા કમર કસી રહી છે. જેને લઇ આવનાર દિવસોમાં પારડી શહેરમાં આપ પાર્ટીનું વાતાવરણ સર્જાય તો નવાઈ નહીં .
