તાપીમાં એક બિલ્ડરની સરાજાહેર નિર્મમ હત્યા થઈ હોવાની ઘટના સામે આવી છે. પ્રાપ્ત માહિતી પ્રમાણે કારમાં ચાર જેટલા શખ્સો આવ્યા હતા અને તલવારના 15 ઘા મારીને બિલ્ડરને રહેંસી નાખ્યા હતા. બનાવની જાણ થતાં પોલીસ કાફલો ઘટનાસ્થળે દોડી આવ્યો હતો અને બિલ્ડરને તાત્કાલિક હોસ્પિટલ લઈ જવામાં આવ્યા હતા. જ્યાં ડોક્ટરોએ તેમને મૃત જાહેર કર્યા હતા. હાલ સમગ્ર મામલે તાપી જિલ્લા પોલીસે વધુ તપાસ હાથ ધરી છે.ઘટનાની વિગતો એવી છે કે, તાપી જિલ્લાનાં વ્યારા ખાતે બિલ્ડરનાં વ્યવસાય સાથે સંકળાયેલા નિસિશ શાહ શુક્રવારે રાત્રે આશરે આઠેક વાગ્યાના સુમારે પોતાના ઘરેથી બાઈક પર નીકળ્યા હતા અને તરબૂચવાળાને ત્યાં ઊભા હતાં. આ દરમિયાન એક કાર નં.GJ-5-JP-2445નાં ચાલકે બાઈકને ટક્કર મારી હતી, જેથી નિસિશ શાહ બાઈક સાથે જમીન પર પડી ગયા અને હજુ ઉઠીને કઈક સમજે એ પહેલાં કારમાં આવેલા ચાર જેટલા ઇસમોએ તલવારો સાથે ઉતરી તલવારોનાં ઘા મારવા લાગ્યા. આ દરમિયાન બિલ્ડરને બચાવવા માટે તરબૂચ વેચનાર ગણેશ નામનો યુવક વચ્ચે પડ્યો હતો. તેને પણ પેટમાં તલવાર વાગતા ગંભીર રીતે ઘાયલ થઈ ગયો. તલવારના 15 જેટલા ઘા મારીને શખ્સો કારમાં નાસી છૂટ્યા હતા. આટલી મોટી ઘટના બનતા સ્થાનિકો અને પોલીસ ઘટના સ્થળે દોડી આવ્યા હતા. જ્યાંથી નિસિશ શાહને લોહીલુહાણ હાલતમાં નજીકની ખાનગી હોસ્પિટલમાં લઈ ગયા હતા. જ્યાં ફરજ પરનાં તબીબે તેઓને મૃત જાહેર કર્યા હતા.
