રાજયમાં આગામી પાચ દિવસ દરમિયાન વાવાઝોડુ , આંધી તેમજ કમોસમી વરસાદની ચેતવણી હવામાન વિભાગ દ્વારા આપવામાં આવી છે. જેના કારણે છેલ્લા ચારેક દિવસથી ગુજરાતમાં વાદળછાયું વાતાવરણ રહે છે. ખાસ કરીને આજે હવામાન વિભાગ દ્વારા ચેતવણી આપવામાં આવી છે કે અરબી સમુદ્રમાં સર્જાયેલા સાયકલોનિક સર્ક્યુલેશન હાલમાં સૌરાષ્ટ્ર અને કચ્છ ઉપર રહેલું છે. જેના કારણે ગુજરાતમાં બનાસકાંઠા, સાબરકાંઠા, અમદાવાદ, ગાંધીનગર, પાટણ, અરવલ્લી, મહેસાણા, ખેડા, આણંદ, વડોદરા, ભરૂચ, મોરબી, જામનગર, સુરેન્દ્રનગર, અમરેલી, જૂનાગઢ, નર્મદા, સુરત, તાપી અને ડાંગમાં હળવા વાવાઝોડા અને ગાજવીજ સાથે કમોસમી વરસાદ પડવાની આગાહી કરવામાં આવી છે. હવામાન વિભાગ દ્વારા ચેતવણી પણ આપવામાં આવી છે કે વીજળી થવા ઉપરાંત વાવાઝોડું અને પ્રતિ કલાકના 30થી 40 કિમીની ઝડપે પવન ફૂંકાશે. આજે દિવસ દરમિયાન અમદાવાદ, ડિસા અને ગાંધીનગરમાં ગરમીનો પારો 41 ડિગ્રી સુધી રહેવા પામ્યો હતો. જયારે અન્ય શહેરોમાં 34 થી 40 ડિગ્રી વચ્ચે ગરમીનો પારો જોવા મળ્યો હતો.
