રાજ્યમાં કોરોનાના કેસ ઓછા થવાને પગલે રાજ્યમાં તબક્કાવાર શૈક્ષણિક કાર્ય શરૂ કરવામાં આવી રહ્યું છે. આગામી 2 સપ્ટેમ્બર-21થી રાજ્યભરની શાળાઓમાં 6થી 8ના વર્ગો શરૂ કરવામાં આવશે. રાજ્યમાં 20 હજારથી વધુ સરકારી શાળાઓ સહિત ધોરણ-6 થી 8ના વર્ગો ધરાવતી કુલ 30 હજારથી વધુ શાળાઓના 32 લાખ જેટલા બાળકોનું વર્ગખંડ શિક્ષણકાર્ય શરૂ થશે. રાજ્યના શિક્ષણ મંત્રી ભુપેન્દ્રસિંહ ચુડાસમાએ જણાવ્યું હતું કે આગામી 2 સપ્ટેમ્બરથી રાજ્યની શાળાઓમાં ધોરણ 6 થી 8 ના વર્ગો શરૂ કરવામાં આવશે. ઓફલાઈન વર્ગોની સાથે ઓનલાઈન શિક્ષણ પણ ચાલુ રાખવામાં આવશે. આ ઉપરાંત ધોરણ 6 થી 8 ના વર્ગોમાં 50 ટકા હાજરી સાથે વર્ગો શરૂ કરવાની મંજૂરી આપવામાં આવી છે. સાથે સાથે શાળાઓમાં ફરજિયાત પણે માસ્ક અને સોશિયલ ડિસ્ટન્સનના નિયમોનું પાલન કરવાનું રહેશે, તેમજ શાળાઓએ પણ તમામ પ્રકારની કોવિડ-19ની ગાઈડલાઈનનું પાલન કરવાનું રહેશે. રાજ્યમાં હાલમાં ધોરણ 9 થી 12ના વર્ગો તેમજ કોલેજમાં ઓફલાઈન શિક્ષણ કાર્ય શરૂ કરવામાં આવ્યું છે.
